Masallı rayon İcra Hakimiyyətinin başçısı Araz Əhmədov Musakücə kəndi ərazisində vətəndaşlarla səyyar görüş-qəbul keçirib. Bu haqda məlumatı Cenublu.az bu gün, 15 sentyabr tarixində Masallı RİH-yə istinadən verir.
Səyyar görüş-qəbulda rayonun idarə, müəssisə və təşkilat rəhbərləri, şəhid ailələri, qazilər, din xadimləri, ağsaqqal və ziyalılar iştirak ediblər.
Qəbul başlamazdan öncə ölkəmizin ərazi bütövlüyü uğrunda Ermənistan silahlı qüvvələri tərəfindən 12 sentyabr gecə saatlarında Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində törətdiyi genişmiqyaslı təxribatın qarşısı alınarkən şəhid olan igidlərimizin xatirəsi bir dəqiqəlik sükutla yad edilib.
Qəbulda çıxış edən vətəndaşlar 14 məsələ ilə bağlı - kənd məktəbindən 13 nəfərinin ölkəmizin müxtəlif universitetlərinə qəbul olması, mövcud olan qəzalı elektrik dirəklərinin dəyişdirilməsi və işıqların gün ərzində dəfələrlə yanıb-sönməsi, içməli su məsələsi, payıbəlli torpaqlarla bağlı, 250 metr yolun asfaltlanmasına kömək göstərilməsi, kənddə məktəb tikintisi, yaşayış evlərinin sığortalanması, qanunsuz ticarət və digər təxirəsalınmaz sosial məsələlər barədə müraciətlər ediblər.
Masallı RİH başçısı Araz Əhmədov görüşü yekunlaşdıraraq, qaldırılan məsələlərin həlli istiqamətində müvafiq qurumlara tapşırıqlar verib. Məsələlərdən bir neçəsi dərhal yerində həll olunub, digərləri barəsində müraciət edən vətəndaşlara qanunamüvafiq izahatlar verilib.
