Masallı rayon İcra Hakimiyyətinin başçısı Araz Əhmədov Çaxırlı və Təklə kənd ərazilərində səyyar görüş-qəbul keçirib. Bu haqda məlumatı Cenublu.az bu gün, 23 avqust tarixində Masallı RİH-yə istinadən verir.
Görüşdə rayon rəhbəri ilə yanaşı, rayon icra hakimiyyəti başçısının birinci müavini Məmmədhüseyn Hüseynov, aparatın şöbə müdirləri Qəşəm Hadıyev, Afəddin Kərimov, ağsaqqallar, din xadimləri, ziyalılar, şəhid ailələri, qazilər, gənclər və digər sakinlər iştirak ediblər.
İlk öncə icra başçısı qeyd olunan kəndlərdən olan Birinci və İkinci Qarabağ müharibələri şəhidlərinin, Qafqaz Müsəlmanları İdarəsinin Cənub bölgəsi üzrə uzun illər qazısı olan Hacı Mirqiyas Ağa Təhməzovun və Mollahəsənli kənd qəbiristanında Azərbaycan Respublikasının Xalq artisti İlham Əsgərovun məzarlarını ziyarət edib.
Sonra rayon rəhbəri Ləngan kəndində yaşayan Birinci Qarabağ müharibəsi şəhidi Musayev Murad Qurbanəli oğlunun ailəsini ziyarət edib, ailənin qayğı və problemləri ilə maraqlanıb, şəhidin yataq xəstəsi olan anası Musayeva Ruqiyyə Ağabala qızına baş çəkib.
Çaxırlı, Bala Təklə, Sarıcəfərli, Təklə, Ləngan, Mollahəsənli, Sığıncaq kəndlərinin vətəndaşları ilə görüş zamanı sakinlər yaşadıqları ərazilərin problemlərini rayon rəhbərinə çatdırıblar və ondan kömək göstərilməsini xahiş ediblər. İcra Hakimiyyətinin başçısı Araz Əhmədov da, öz növbəsində, məsələləri nəzarətə götürərək həlli mümkün olanları yerindəcə həll edib.
