Sosial şəbəkələrdə Lənkəranın incisi sayılan Dairəvi (Zindan) qalanın damının şiferlə örtülməsinin fotoları yayılıb. Bu hadisə sosial media istifadəçiləri, ələlxüsus da lənkəranlılar tərəfindən birmənalı qarşılanmayıb.
Məsələ ilə bağlı Mədəniyyət Nazirliyi açıqlama verib:
“Bir neçə il öncə Lənkəran şəhərində yerləşən Dairəvi qalanın (Zindan qalası) dam örtüyünün çökməsi nəticəsində abidə qəzalı vəziyyətə düşüb. Hazırda daxili imkanlar hesabına qalanın ətrafında və içərisində təmizlik, abadlıq işləri görülür, qalanın mühafizəsi istiqamətində zəruri tədbirlər həyata keçirilir. Aparılacaq bərpa işlərinin başlanılmasına qədər tarixi tikilinin təbii təsirlərdən, yağıntılardan qorunması məqsədilə qalanın damı müvəqqəti örtüklə əvəz olunub”.
