Lənkəran rayonunun Separadi kəndi ərazisində torpaq sürüşməsi qeydə alınıb.
Cenublu.az xəbər verir ki, təxminən 200 metr uzunluqda və 7 metr hündürlükdən torpaq qatı sürüşərək Ulum çayına tökülüb.
Kənd sakinlərinin sözlərinə görə, sürüşmə prosesi uzun müddətdir davam edir. Son günlər yağan yağışlardan sonra isə proses daha da aktivləşib. Bildirilir ki, çaya sel gələn zaman suyun səviyyəsi qalxır və ətrafa daşaraq ciddi fəsadlar yaradır. Nəticədə meyvə ağacları, eləcə də toyuq-cücə üçün tikilən hin sel suları tərəfindən aparılıb.
Lənkəran Su Meliorasiya Sistemlərinin İstismarı İdarəsinin mühəndis-hidrotexniki Ayıq Əliyev bildirib ki, daxil olan müraciət əsasında əraziyə baxış keçirilib. Onun sözlərinə görə, sürüşmə təxminən 200 metr uzunluqda qeydə alınıb.
"Bununla əlaqədar idarənin texnikalarının köməyi ilə yerli materiallardan istifadə etməklə müvəqqəti olaraq torpaq bəndin qurulması planlaşdırılır ki, vəziyyət daha da ağırlaşmasın. Daha sonra isə məsələ ilə bağlı yuxarı təşkilatlara müraciət olunacaq, komissiya tərəfindən əraziyə baxış keçirilərək layihə sənədləri hazırlanacaq", – deyə o qeyd edib.
Qeyd edək ki, Ulum çayının sağ və sol sahillərində ümumilikdə 500 metrədək bənd vurulsa da, əlavə maliyyə vəsaiti ayrılmadığı üçün işlər yarımçıq qalıb.
