Lənkəran şəhərinin şəhid Orxan Quluzadə küçəsinin sakinləri ərazinin yenidən qanunsuz zibilxanaya çevrildiyini bildirərək problemin həllini istəyirlər.
Cenublu.az xəbər verir ki, şikayətçilərin sözlərinə görə, dəmiryol xəttinin aşağı hissəsinə əsasən gecə saatlarında naməlum şəxslər avtomobillərlə gələrək məişət tullantıları atırlar. Nəticədə ərazi yenidən zibil poliqonunu xatırladan vəziyyətə düşüb.
Onlar bildirirlər ki, yayılan kəskin üfunətə görə evlərin qapı-pəncərələrini açmaq mümkün deyil. Antisanitar vəziyyət həm əhalinin sağlamlığı üçün risk yaradır, həm də əraziyə toplaşan sahibsiz itlər, xüsusilə gecə saatlarında, sakinlərin təhlükəsizliyini təhdid edir.
Qeyd edək ki, bir müddət əvvəl Cenublu.az-ın məsələni işıqlandırmasından sonra ərazi tullantılardan təmizlənmişdi. Lakin qısa müddət sonra həmin yer yenidən qanunsuz zibilxanaya çevrilib.
Sakinlər aidiyyəti qurumlardan problemin birdəfəlik həll edilməsini, əraziyə nəzarətin gücləndirilməsini və qanunsuz tullantı atan şəxslər barəsində ciddi tədbirlərin görülməsini tələb edirlər.
