Lənkəranda "Amerika ağ kəpənəyi" kimi tanınan zərərvericilərin kütləvi yayılması sakinlərin narahatlığına səbəb olub.
Cenublu.az xəbər verir ki, zərərvericiyə Liman şəhəri, Boladi, Separadi, Zövlə kəndləri və digər ərazilərdə geniş şəkildə rast gəlinir.
Sakinlərin sözlərinə görə, may ayının sonlarından müşahidə olunan zərərvericilər meyvə ağaclarına və tərəvəz sahələrinə ciddi ziyan vurur. Gündüzlər yaşıllıqlar arasında gizlənən kəpənəklər gecələr evlərə daxil olur. Sakinlər bildirirlər ki, öz imkanları ilə apardıqları kimyəvi mübarizə tədbirləri nəticə vermir.
Kənd Təsərrüfatı Nazirliyi yanında Aqrar Xidmətlər Agentliyi hazırda Lənkəranın Nərimanabad, Üzümçülük, Liman, Şirinsu, Boladi və Zövlə kəndlərində zərərvericiyə qarşı mübarizə tədbirləri həyata keçirir. Ümumilikdə 500 hektar ərazidə xüsusi texnika və preparatlardan istifadə olunmaqla çiləmə işləri aparılır.
Mütəxəssislər bildirirlər ki, zərərvericinin yaratdığı torlar aşkar edildikdə, həmin hissələr kəsilərək məhv edilməli, zərurət olduqda isə kimyəvi preparatlardan istifadə edilməlidir.
