Xəzər dənizinin Lənkəran sahilində mazut qalıqları müşahidə olunur.
Cenublu.az -ın verdiyi xəbərə görə, Lənkəran rayonunda Xəzər dənizi sahilində müşahidə olunan qara mazut ləkələri yerli sakinlər və balıqçılar arasında narahatlığa səbəb olub. Dalğalar vasitəsilə sahilə çıxan mazut (neft) qalıqları kilometrlərlə uzanan sahilboyu ərazilərə yayılıb.
Sakinlər bildirirlər ki, son vaxtlar havanın küləkli olması çirklənməni daha da artırır. Balıqçılar isə mazut hissəciklərinin torlara yapışaraq ov prosesini çətinləşdirdiyini, bəzən də qayıqlara zərər vurduğunu deyirlər.
Mütəxəssislərin sözlərinə görə, sahilə çıxan maddələr karbohidrogen tərkibli neft qalıqlarıdır. "Hazırda Xəzərin cənub hissəsində aktiv neft hasilatı aparılmadığından, bu halın daha çox təbii proseslər nəticəsində — dəniz dibindəki layların hərəkəti və dalğaların təsiri ilə baş verdiyi ehtimal olunur".
Ekoloqlar isə problemin həllini sahilboyu ərazilərdə təmizləmə işlərinin aparılmasında, mütəmadi monitorinqin gücləndirilməsində və çirklənmənin mənbəyinin dəqiq müəyyənləşdirilməsində görürlər.
