Lənkəran şəhərinin "Raypo" adlanan ərazisində park və küçələrin gecə işıqlandırılması ilə bağlı sakinlərin narazılığı hələ də davam edir.
Vətəndaşların Cenublu.az -a verdiyi məlumata görə, yay mövsümündə insanlar axşam saatlarında parklara və dənizkənarı ərazilərə üz tutduğu halda, küçə və park işıqları təxminən saat 20:30-da yandırılır, lakin 00:00–00:30 radələrində söndürülür. Bu isə gecə saatlarında istirahət edən vətəndaşların narazılığına səbəb olur.
Şikayətçilər bildirirlər ki, işıqların əvvəlki qaydada 21:00-da yandırılıb 01:00-da söndürülməsi daha məqsədəuyğun olardı. Onların sözlərinə görə, bu məsələ uzun müddətdir gündəmdədir və dəfələrlə qaldırılmasına baxmayaraq, problem hələ də həllini tapmayıb.
Sakinlər aidiyyəti qurumlardan işıqlandırma qrafikinin yenidən nəzərdən keçirilməsini və yay mövsümündə insanların rahat istirahət edə bilməsi üçün problemin aradan qaldırılmasını tələb edirlər.
