“Azərbaycan Rektorlar Konfransının yaradılması” - ECAR Erasmus+ layihəsi çərçivəsində növbəti səfər İspaniyanın Madrid şəhərinə baş tutub. Bu haqda məlumatı Cenublu.az bu gün, 20 iyul tarixində verir.
10-14 iyul tarixlərində keçirilən layihənin məqsədi tələbə və məzun işləri üzrə İspaniya Rektorlar Konfransı və İspaniya ali təhsil müəssisələrinin, eləcə də Fransa, Polşa və Litvadan olan tərəfdaşların iştirakı ilə həmin ölkələrin təcrübəsinin öyrənilməsi olub.
Səfərdə Milli Məclisin deputatı, Elm və Təhsil Komitəsinin üzvü Tamam Cəfərova, Azərbaycan Respublikası Elm və Təhsil Nazirinin müşaviri Nicat Məmmədli, nazirliyin Elm sektorunun müdiri Süleyman Turxan, o cümlədən layihə konsorsiumunun üzvü olan 16 ali təhsil müəssisəsinin rektorları, prorektorları və digər məsul şəxslərindən ibarət 40 nəfərlik nümayəndə heyəti iştirak edib.
Təlimlərdə LDU-nu universitetin professoru Mikayıl Məhərrəmov və Beynəlxalq əməkdaşlıq şöbəsinin müdir müavini Günel Məmmədova təmsil ediblər.
1 həftəlik təlim-seminarların ilk günü III Çarlz Universitetində baş tutub. Layihənin koordinatoru olan Bakı Biznes Universitetinin rektoru, professor İbad Abbasov təhsilin qarşısında duran mühüm vəzifələrdən söz açıb və bu məqsədlə beynəlmiləlləşmə və inteqrasiyanın yüksək əhəmiyyət kəsb etdiyini vurğulayıb.
Yekunda sual-cavab sessiyası baş tutub, xarici ekspertlərlə faydalı fikir mübadilələri aparılıb.
