Lənkəran üzrə bu il qəbul imtahanında ən yüksək bal toplayan Ziya Əsgərli qazandığı uğurun sirrindən və həyatından danışıb. Bununla bağlı Cenublu.az bu gün, 29 avqust tarixində Tehsil.biz-ə istinadən məlumat verir.
Ziya Əsgərli 12 fevral 2005-ci ildə Lənkəranda anadan olub. İbtidai təhsilini Kosalar kənd orta məktəbində alıb. 5-ci sinifdə imtahan verərək S.Kazımbəyov adına şəhər 6 saylı orta məktəbinə keçib. 9-cu sinif imtahanında 297,5 bal toplayaraq Lənkəran üzrə birinci olub. Birinci blok imtahanında 672 bal toplayıb və bu nəticə onu məyus edib, çünki hədəfi 672-ni keçmək olub. Lakin 2-ci blok imtahanında gözlədiyi nəticəni əldə edə bilib və 680,4 bal toplayaraq Lənkəran üzrə birinci olub.
7-ci sinifdən Bakı Ali Neft Məktəbinə daxil olmaq istəyən Ziya bu günlərdə BANM-də qonaq olub. Xoş təəssüratlarla universitetdən ayrılan gənc kompüter mühəndisliyi ixtisası üzrə təhsil almaq istəyir. O, seçimini belə əsaslandırır: “Kompüter mühəndisliyi bəstəkarlığa bənzəyir. Bəstəkar notlardan istifadə edərək musiqi yazır və “Koroğlu” kimi əsərlər meydana çıxır. Kompüter proqramçısı isə proqramlar yazır və beləliklə, Facebook, Twitter kimi platformalar meydana çıxır”.
Əvvəl Ziya həkim olmaq arzusunda olub. Daha sonra öz yaradıcı tərəfini kəşf edən gənc, ixtisas seçimini dəyişərək, BANM-də təhsil almağa qərar verib. Magistr təhsilini isə xaricdə almağı planlaşdırır.
“Bu təkcə mənim nəticəm deyil. Qazandığım uğurun pərdəarxası qəhrəmanları var. Bunlar mənim müəllimlərim və valideynlərimdir. Məhz onların mənə verdiyi dəstək və inam sahəsində bu nəticəni əldə etdim”, - Ziya öz uğurunu bu cür şərh edir.
Universitetə hazırlaşan tələbələrə Ziya məktəb təhsilinin vacibliyi haqda danışıb. “Heç vaxt məktəbi zəif oxuyan şagird, son 1-2 il hazırlığa getməklə qəbul imtahanında yüksək nəticə qazana bilməz. Dərsə çox vaxt ayırmamışam, amma daim hazırlıqlı getmişəm. Elə olub ki, gün ərzində yarım saat oxumuşam, amma bu vaxtdan maksimum dərəcədə faydalanmışam”.
Sonda Ziya məktəblilərə öz tövsiyələrini də verib: “7-8-ci sinifdə oxuyan şagirdlərə onu tövsiyə edə bilərəm ki, fənləri öyrənməklə yanaşı, uğur qazanmağın nə olduğunu və nə istədiklərini, yəni məqsədlərini müəyyən etsinlər”.
