Prezident İlham Əliyevin tapşırıqlarına əsasən, regionlarda elektrik təsərrüfatını yeniləyən “Azərişıq” ASC Lənkəranın daha 4 kəndində – Viravul, Daşdatük, Girdəni və Gərmətükdə yenidənqurma işlərini davam etdirir.
ASC-dən bildirilib ki, adıçəkilən kəndlər arasında 4 min nəfərə yaxın sakini olan Viravul kəndində yeni güc mərkəzləri yaradılır. Paralel olaraq, sovet dövründən qalma köhnə dayaqlar yeni və müasirləri ilə əvəz edilir.
İstismar müddəti başa çatmış açıq naqillərin yerinə özünüdaşıyan izolyasiyalı naqillər (ÖİN) çəkilir. Köhnə sayğaclar həyətyanı sahələrdən çıxarılaraq əvəzində müasir standartlara cavab verən yeni sayğaclar qoşulur.
İşlər yekunlaşdıqdan sonra kənd sakinləri dayanıqlı və fasiləsiz elektrik enerjisi ilə təmin olunmaqla yanaşı, elektrik enerjisi itkisinin qarşısı da alınacaq.
