Lənkəranda “Gənclər Paytaxtı” layihəsinin açılış mərasimində Prezident tərəfindən mükafatlandırılan Orucəli Abbaszadə öz minnətdarlığını bildirib. Bu haqda məlumatı Cenublu.az bu gün, 3 fevral tarixində Azərtac-a istinadən verir.
Lənkəran şəhərində “Gənclər Paytaxtı” layihəsinin açılış mərasimi həyata keçirilib. Tədbirdə Prezident mükafatlarına layiq görülmüş gənclər təltif olunublar.
Mükafatlandırılan Vətən müharibəsinin iştirakçısı, "Regional İnkişaf" İctimai Birliyinin əməkdaşı, Hərbi Qənimətlər Parkının meneceri Orucəli Abbaszadə qeyd edib: “Doğma şəhərimiz Lənkəranın 2024-cü ilin "Gənclər Paytaxtı", eyni zamanda “2024-cü il Türk Dünyasının Gənclik Paytaxtı” seçilməsi münasibətilə bütün lənkəranlıları ürəkdən təbrik edirəm. Bu əlamətdar hadisələr Lənkərandan olan gənc kimi mənə böyük sevinc hissi yaşadır. İnanıram ki, cari il regionumuzun gəncləri üçün uğurlu, faydalı və yaddaqalan olacaq. Hər bir gənci bu ildə keçiriləcək layihə və tədbirlərdə fəallıq göstərməyə, öz təşəbbüsümüzlə ölkəmizin ictimai həyatına töhfə verməyə çağırıram”.
