Lənkəranda yol qəzasında təqsirləndirilən Xaqani Sucayevə hökm oxunub. Bu haqda məlumatı Cenublu.az bu gün, 8 iyun tarixində Pravda.az-a istinadən verir.
Proses Lənkəran Ağır Cinayətlər Məhkəməsində hakim Neymət Məmmədovun sədrliyi ilə keçirilib. Məhkəmənin hökmü ilə ona 5 il müddətinə azadlıqdan məhrumetmə cəzası təyin edilib. Təqsirləndirilən şəxs cəzasını məntəqə tipli cəzaçəkmə müəssisəsində çəkəcək.
İttihama görə, hadisə ötən il oktyabrın 24-də Lənkəran rayonunun Təngivan kəndi ərazisində qeydə alınıb.
Rayon sakini, 36 yaşlı Xaqani Sucayev idarə etdiyi “VAZ-21014” markalı avtomobillə hərəkətdə olarkən idarəetməni itirib və nəqliyyat vasitəsi yolun kənarındakı çay yatağına aşıb. Nəticədə həmin maşında olan Lənkəran rayon sakini Ümid Əliyev ölüb, Loğman Qurbanov isə bədən xəsarətləri alıb.
