Lənkəran rayonu Mamusta kənd məktəbinin binası əsaslı təmir olunur. Bu haqda məlumatı Cenublu.az bu gün, 11 yanvar tarixində verir.
Şəhid Məmməd Fərzullayevin adını daşıyan məktəbin təmirinə ötən ilin yayında başlanılıb. 2 korpuslu binada artıq beton işləri görülüb. Dam örtüyü, qapı və pəncərələr dəyişdirilib. Müasir istilik sistemi qurulub. Məktəbin binası hazır olduqdan sonra 600-ə qədər şagird bu məktəbin imkanlarından tam səviyyədə istifadə edə biləcək.
Məktəbin həyətində, həmçinin 2 su anbarı inşa olunur. Onların hər biri 100 kubmetr su tutumu olan su anbarıdır ki, biri məktəbi içməli su ilə təmin edəcək, digəri isə yanğınsöndürmə məqsədilə istifadə olunan su anbarı olacaq.
May ayında istifadəyə verilməsi nəzərdə tutulan məktəbin 30 sinif otağından əlavə, laboratoriyaları və fənn kabinetləri də olacaq. Bundan əlavə, idman zalı, kitabxana və yeməkxana fəaliyyət göstərəcək.
Mamusta kənd məktəbinin əsaslı təmiri ilə yanaşı, 400-ə yaxın şagirdi olan Viyən kənd orta məktəbi üçün də yeni binanın tikintisinə başlanılıb. 2024-cü ildə Girdəni kənd orta məktəbi üçün də yeni bina tikiləcək. Artıq lahiyə smeta sənədləri hazırdır.
Qeyd edək ki, son illərdə Lənkəranda 50-dən çox yeni məktəb binası tikilib, yaxud əsaslı təmir edilib. Rayonda daha 13 məktəb üçün yeni binanın tikintisinə, 13 məktəbin əsaslı təmirinə ehtiyac var.
