Lənkəranda şirkət rəhbərinə qarşı xuliqanlıq etmiş Təngivan kənd sakini, 62 yaşlı Əlibala Nemətova (soyad şərtidir) hökm oxunub. Bu haqda məlumatı Cenublu.az bu gün, 18 iyun tarixində Bizim.media.az-a istinadən verir.
Hadisə “PROFCO” MMC-nin qum-çınqıl yatağında baş verib. Əlibala Nemətov qum-çınqıl istehsalı müəssisəsinin yaşadığı evinə yaxın olmasını, həmin müəssisənin səhər tezdən yüksək siqnalla işə salınmasını, dəfələrlə etdiyi şikayətlərin nəticəsinin olmamasını bildirib. O, səhər saatlarında yaşadığı evdən özü ilə 1 ədəd birlitrlik plastik butulkada benzin götürərək müəssisənin həyətinə gəlib. Burada Əlibala müəssisənin rəhbəri Şaiq Babayevlə dalaşaraq ondan fəaliyyəti dayandırmağı tələb edib. Həmçinin uca səslə söyüş söyüb, əlindəki benzini direktorun üstünə töküb və ona yüngül xəsarətlər yetirib.
Onun barəsində Cinayət Məcəlləsinin “Xuliqanlıq – silah və ya silah qismində əşya tətbiq etməklə” maddəsi ilə cinayət işi açılıb.
Lənkəran rayon Məhkəməsinin hökmünə görə, Ə. Nemətova 1 il azadlığın məhdudlaşdırılması cəzası verilib. Onun bədəninə elektron qolbaq yerləşdirilib və yaşadığı yeri tərk etməmək kimi vəzifələr üzərinə qoyulub.
