Lənkəranda və ətraf rayonlarda qarın yağması bir sıra fəsadlar yaradıb. Bu haqda məlumatı Cenublu.az bu gün, 15 yanvar tarixində verir.
Məsələ ilə bağlı Lənkəran şəhər İcra Hakimiyyətindən bildirilib ki, artıq bir çox fəsadlar aradan qaldırılıb:
“Yanvar ayının 13-ü saat 18:00-dan yanvarın 14-ü gecə saatlarına kimi yağan aramsız qar nəticəsində rayonda bir sıra fəsadlar yaranıb. Qarın hündürlüyü 52 sm-ə qədər çatıb. Lənkəran şəhər İcra Hakimiyyətinin Fövqəladə Hallar Komissiyası və aidiyyəti idarələrin işçi qüvvələrəri gücləndirici iş rejimində çalışır. Lənkəranın əsas küçə və prospektlərinin qardan təmizlənməsi işləri davam edir. Zərifə Əliyeva, Koroğlu, Nizami, Füzuli, Mirmustafa xan, Əli Məmmədov, F.Məmmədov, Nəsimi, Şəhidlər Xiyabanı, T. İsmayılov, H.Abdullayev, H. Aslanov, Mirsalayev, Nəsirli, Paşa Təhməzov, A.Əliyev, Heydər Əliyev və digər əsas küçələr və prospeklərdə hərəkət artıq tam bərpa olunub”.
Rayon ərazisində işıqların sönməsi ilə bağlı İcra Hakimiyyətindən bildirilib ki, işıqların tam bərpası günün sonunadək təmin olunacaq:
“Rayon ərazisində ağacların aşması nəticəsində işıq xətləri sıradan çıxıb. “Azərişıq” ASC-nin Lənkəran Regional İdarəsinin əməkdaşları fəsadları aradan qaldırmaq üçün var gücləri ilə çalışırlar. Bu istiqamətdə ətraf rayonlardan 10-a yaxın texnika cəlb olunub. Lənkəran şəhərinin 80-90 faizinin işıq təminatı artıq tam bərpa olunub. Əsas xətlərdəki fəsadlar aradan qaldırılıb. Ara küçələrdə olan xətlərin bərpası isə günün sonuna kimi tamamlanacaq. Qırılan ağaclar yolun kənarına daşınıb”.
[URIS id=51889]
