Sosial Xidmətlər Agentliyinin təşkilatçılığı ilə Lənkəranda “Məişət zorakılığı qurbanları ilə sosial iş” mövzusunda tədbir keçirilib. Bu haqda bu gün, 25 avqust tarixində Cenublu.az Azərtac.az-a istinadən xəbər verir.
Görüş Heydər Əliyev Mərkəzində baş tutub. Tədbirdə Sosial Xidmətlər Agentliyinin Sosial müəssisələrlə iş departamentinin müdir müavini Sara Ağayeva, Ombudsmanın Cənub Regional Mərkəzinin rəhbəri Ziya İsmayılov, "Azərbaycan Uşaqları" İctimai Birliyinin sədri Kəmalə Ağazadə və digər qurumların və təşkilatların nümayəndələri iştirak ediblər.
Müzakirə zamanı iştirakçılara məişət zorakılığından zərər çəkmiş şəxslərə qeyri-dövlət yardım mərkəzlərinin akkreditasiyasının agentlik tərəfindən həyata keçirilməsi haqda məlumat verilib. Bildirilib ki, hazırda dövlət qurumlarının nümayəndələrindən ibarət Akkreditasiya Komissiyası tərəfindən akkreditasiya olunmuş 8 qeyri-dövlət yardım mərkəzi bu sahədə fəaliyyətini davam etdirir.
Daha sonra təşkilatçılar tərəfindən, zorakılığa məruz qalmış şəxslərlə bağlı görülən tədbirlər haqda məlumatlar verilib, sığınacağa yerləşdirilmə proseduru izah edilib. Təlim zamanı qeyd olunub ki, agentliyin “Qayğı” Çağrı Mərkəzinin (116 123) bir istiqaməti də məhz məişət zorakılığı ilə üzləşən şəxslərin müraciəti üçün nəzərdə tutulub.
