Lənkəran rayonunun Osakücə ilə Tatoba kəndlərini birləşdirən və Osakücə kənd qəbiristanlığına gedən yolun üzərində inşa edilən yeni körpünün açılışı baş tutub. Bu haqda məlumatı Cenublu.az bu gün, 27 avqust tarixində Lənkəran ŞİH-ə istinadən verir.
Açılış mərasimində çıxış edən icra başçısı Taleh Qaraşov öncə Osakücə şəhidlərinin xatirəsinə inşa olunan abidə kompleksini ziyarət edib. Dövlət himninin səsləndirilməsi ilə başlayan tədbirdə o, körpü tikintisinin xeyirxah əməl olmasından danışıb və əməyi keçənlərə minnətdarlığını bildirib.
Çıxışlardan sonra Taleh Qaraşov şəhid valideynləri və körpünün tikintisinə dəstək göstərən yerli xeyriyyəçi ilə birgə körpünün açılış lentini kəsib.
Sonda kənd qəbiristanlığındakı şəhid məzarları ziyarət olunub.
