Lənkəranda evlə təmin olunan Vətən müharibəsi qazisi İlqar Əliyev dövlətin göstərdiyi qayğılar haqda danışıb. Bu haqda bu gün, 2 sentyabr tarixində Cenublu.az ARB Cənub-a istinadən xəbər verir.
İlqar Əliyev ötən ilin avqust ayından etibarən ona verilən mənzildə yaşayır. Qazimizin atası Xanlar kişi Birinci Qarabağ müharibəsinin iştirakçısı olub. Elə İlqarın düşmənə sonsuz nifrəti də ona atasından keçib.
Müharibəyə könüllü gedən qazimiz Kəlbəcər, Füzuli, Cəbrayıl və Xocavənd istiqamətində döyüşlərdə iştirak edib. 1 noyabr tarixində Xocavənd istiqamətində düşmən mərmisinin dalğasında kəllə-beyin travması almasına baxmayaraq, meydandan çıxmayıb. 4 gün düşmənə qarşı döyüşən İlqar Əliyev 5 noyabr tarixində təxliyə olunub. Vətən müharibəsi qazisinin müalicəsi üçün dövlət tərəfindən lazımi dəstək göstərilib.
O bildirir ki, müharibədən öncə kirayə evdə yaşayıb, lakin müharibədən sonra evlə təmin olunub. Onun müalicəsi indi də dövlət tərəfindən qarşılanır. Qeyd edək ki, Əmək və əhalinin Sosial Müdafiəsi Nazirliyi tərəfindən 2021-ci il avqust ayının 21-də Lənkəran rayonunda 45 mənzilli yaşayış binası Vətən müharibəsində şəhid olan qəhrəmanlarımızın ailələrinin və qazilərin istifadəsinə verilib. Binada 2 Birinci Qarabağ müharibəsi, 39 Vətən müharibəsi şəhid ailəsi və 4 Vətən müharibəsi əlili yaşayır.
