Lənkəranda dayanacaqların ticarət obyektlərinə çevrilməsi ilə bağlı iddialar səslənilir. Bu haqda məlumatı Cenublu.az bu gün, 8 iyun tarixində Bizim.media-ya istinadən verir.
Sakinlər bildirirlər ki, Həzi Aslanov küçəsində yerləşən dayanacaq bir müddət öncə iki hissəyə bölünərək, yarısında skuterləri icarəyə verən məntəqə fəaliyyətə başlayıb.
“Əvvəl geniş və rahat dayanacaq idi. Köhnə olsa da, yayda günəş şüalarından, qışda isə soyuq və yağışdan qoruna bilirdik. İndi isə sərnişinlər üçün kiçik bir yer qalıb”, - deyə sakinlər öz iradlarını bildiriblər.
Məsələ ilə bağlı Azərbaycan Yerüstü Nəqliyyat Agentliyindən bildirildi ki, ölkə üzrə nəqliyyatın tənzimlənməsi AYNA-nın səlahiyyətinə aid olsa da, bölgələrdəki dayanacaqlar yerli qurumların balansındadır.
Lənkəran şəhər İcra Hakimiyyəti isə məsələ araşdırıldıqdan sonra ətraflı məlumat veriləcəyini qeyd edib.
