Lənkəran Olimpiya İdman Kompleksində “El-Oba” milli adət-ənənələr düşərgəsi keçirilib. Bu haqda məlumatı Cenublu.az bu gün, 29 may tarixində verir.
30 şəhər və rayonu təmsil edən 65 gəncin iştirakı ilə keçirilən düşərgə müddətində gənclərə “Xalça motivləri və milli ornamentlərin yağlı boya ilə bədii şüşə üzərində işlənməsi”, “Xarıbülbül təsvirinin muncuqla kətan parça üzərində təsviri”, “Araxçın və çarıq hazırlanması”, “Qədim həsirçilik sənəti – zənbil toxuma”, “Lənkəranın milli yeməyi – ləvənginin hazırlanması” mövzularında ustad dərsləri təşkil olunub.
Gənclər, həmçinin “Milli rəqs gecəsi”, “Yallı rəqsi”, “Qarabağ yallısı” üzrə rəqs dərslərində iştirak edib, milli filmlərdən səhnəciklər, musiqili çıxışlar, saz və tar ifalarında milli musiqilər nümayiş etdiriblər.
İştirakçılar “Gənclər arasında erkən nikah və onun fəsadları” və “Narkotik asılılığı və onun zərərləri” başlıqlı maarifləndirici təlimlərə, müxtəlif fəaliyyətlərə (çuval-qaçdı, kəndirdartma, şahmat, nərd və digər stolüstü oyunlar) qoşulublar.
