Lənkəran rayonunun Velədi kəndi ərazisində aparılan tikinti işləri zamanı maddi-mədəniyyət nümunələri aşkarlanıb. Bu haqda məlumatı Cenublu.az bu gün, 15 avqust tarixində Apa.az-a istinadən verir.
Belə ki, Velədi kəndi ərazisində Lənkərançayın sağ sahilində Velədi və Gərmətük kəndlərinin arasında yerləşən yeni məhəllədə hasar tikintisi ilə əlaqədar qazılan xəndəkdə orta əsrlərə aid şirsiz və şirli saxsı məmulatları tapılıb. Əraziyə AMEA-nın Folklor, etnoqrafiya və arxeologiya şöbəsinin aparıcı elmi işçiləri t.ü.f.d, arxeoloq Samir Kərimov və t.ü.f.d. Mais Cəfərov tərəfindən baxış keçirilib. Tapılan saxsı məmulatları burada IX-XI əsrlərə aid yaşayış yerinin mövcudluğunu deməyə əsas verir.
Həmçinin, həmin ərazidən təqribən 1 km şərqdə həyətlərin birində quyu qazılarkən təqribən 3-4 m dərinlikdən erkən orta əsrlərə aid buxurdan və saxsı qazan tapılıb.
Qeyd edək ki, bir neçə il əvvəl də oxşar tapıntılar Velədi kəndində həyatyanı sahədə quyu qazılarkən aşkar edilib. Bütün bunlar Lənkərançayın sağ sahilində orta əsrlərə aid zəngin arxeoloji abidələrin olması ehtimalını yaradır.
