Lənkəran rayonu üzrə təhsil sektorunun müdiri Ülviyyə Əliyeva vəzifəsindən azad olunaraq Astara rayonu üzrə təhsil sektorunun müdiri təyin olunub. Bu haqda məlumatı Cenublu.az bu gün, 9 avqust tarixində Lənkəran-Astara Regional Təhsil İdarəsinə istinadən verir.
Onun yerinə, yəni Lənkəran rayonu üzrə təhsil sektorunun müdiri vəzifəsinə Elman Qardaşxan oğlu Rzayev təyinat alıb. O, bundan öncə Lənkəran rayon N.Axundov adına Boladi kənd 1 nömrəli tam orta məktəbinin direktoru vəzifəsində çalışıb.
Qeyd edək ki, Ülviyyə Əliyeva 1995-ci ildə Bakı Dövlət Universitetinin filologiya fakültəsini bitirib. 2019-cu il tarixindən Lənkəran Dövlət Universitetinin doktorantıdır. 1993-2006-cı illərdə Lənkəran şəhər 9 nömrəli məktəbdə ixtisası üzrə müəllim, 2007-2010-cu illərdə Şilavar kənd ümumi orta məktəbində direktor, 2011-ci ildə Xüsusi İnternat məktəbində direktor, 2011-2020-ci illərdə Lənkəran Şəhər 7 nömrəli tam orta məktəbdə direktor, 2020-2022-ci illərdə Lənkəran Şəhər Təhsil şöbəsinin müdiri və Lənkəran-Astara Regional Təhsil İdarəsinin Lənkəran sektoru üzrə müdiri vəzifəsində işləyib.
