Azərbaycan Silahlı Qüvvələrinin mayoru, Vətən müharibəsi şəhidi İqbal Bayramovun məzarı ziyarət olunub. Bu haqda məlumatı Cenublu.az bu gün, 8 avqust tarixində Lənkəran rayonu A.Quliyev adına Hirkan qəsəbə tam orta məktəbinə istinadən verir.
Şəhidimizi ziyarət edənlər arasında Hirkan qəsəbə tam orta məktəbin kollektivi, şəhid ataları və icra nümayəndələri iştirak ediblər.
İqbal Bayramov 4 iyul 1977-ci ildə Lənkəran şəhərinin Hirkan qəsəbəsində anadan olub. 1984-1994-cü illərdə Hirkan qəsəbəsində A. Quliyev adına tam orta məktəbdə təhsil alıb. 1994-1998-ci illərdə isə Azərbaycan Dövlət Neft Akademiyasında (ADNA) "Energetika" ixtisası üzrə ali təhsil alıb. Kafedra hərbi olduğu üçün 1998-ci ildə "leytenant" hərbi rütbəsi alıb. İqbal Bayramov 1998-2004-cü illərdə Azərbaycan Silahlı Qüvvələrinin Ağdam rayonunda yerləşən "N" saylı hərbi hissəsində xidmət edib.
2011-ci ildə "mayor" hərbi rütbəsi alıb. 5 yanvar 2018-ci ildə ehtiyata buraxılması barədə müraciət edib və 14 yanvar tarixində ehtiyata buraxılıb.
Vətən müharibəsi zamanı Füzulinin və Cəbrayılın azadlığı uğrunda gedən döyüşlərdə savaşıb. İqbal Bayramov oktyabrın 5-də Cəbrayıl döyüşləri zamanı şəhid olub. Lənkəran şəhərində dəfn olunub.
