Lənkəranda şəhid İmaməli Şəvəqqət oğlu Əhədzadənin xatirəsinə inşa edilən bulağın açılışı onun doğum günündə baş tutub. Bu haqda məlumatı Cenublu.az bu gün, 25 avqust tarixində Lənkəran ŞİH-ə istinadən verir.
Açılış mərasimində ŞİH başçısı Taleh Qaraşov xatirə bulağının açılış lentini şəhid anası Rəsmiyyə Şükürova ilə birgə kəsib. Çıxışlardan sonra məktəblilərin ifasında şəhidlərimizə həsr olunan şeirlər səsləndirilib. Tədbirdən sonra Lənkəran ŞİH tərəfindən şəhid ailələri və ictimaiyyət nümayəndələri Şiləvar qəbiristanlığında şəhidlərimizin məzarlarını ziyarət ediblər.
Qeyd edək ki, İ.Əhədzadə 24 avqust 1997-ci ildə Lənkəran şəhərində anadan olub. 2004-2015-ci illərdə Lənkəran şəhər Xarici Dillər Təmayüllü gimnaziyada təhsil alıb. Vətən müharibəsi zamanı Füzuli-Cəbrayıl istiqamətində gedən döyüşlərdə şəhidlik zirvəsinə ucalıb. Ölümündən sonra “Vətən uğrunda”, “Cəsur döyüşçü”, “Döyüşdə fərqlənməyə görə” və “Füzulinin azad olunmasına görə” medalları ilə təltif olunub.
