Lənkəran Olimpiya Kompleksində gənc alimlərin yay düşərgəsinə start verilib. Bu haqda məlumatı Cenublu.az bugün, 8 avqust tarixində Respublika Olimpiya Mərkəzinə istinadən verir.
Düşərgənin proqramına əsasən, ilk gündə rəsmi açılış tədbiri baş tutub, daha sonra FHN-in əməkdaşları tərəfindən gənclərə “Fövqəladə hallarda davranış qaydaları”, Səhiyyə Nazirliyinin əməkdaşları tərəfindən isə “İlk tibbi yardım” mövzusunda əyani-praktik təlim keçirilib. Gün ərzində gənclərin asudə vaxtlarının səmərəli təşkili üçün intellektual-əyləncəli oyunlar, idman yarışları, müsabiqələr təşkil edilib.
Düşərgə müddətində gənclər üçün “Tənqidi düşüncə”, “Beynəlxalq təqaüdlər”, “Gənc alimlərin fərdi və intellektual inkişafı”, “Təqdimat bacarıqlarının təkmilləşdirilməsi”, “Akademik tədqiqatların nəticələrinin elmmetrik bazalarda işıqlandırılması” və s. bu kimi mövzularda təlim, mühazirə, seminar, debat, ustad dərslərinin keçirilməsi nəzərdə tutulub.
Qeyd edək ki, düşərgə Gənclər və İdman Nazirliyi və AMEA Gənc Alim və Mütəxəssislər Şurasının birgə təşkilatçılığı ilə baş tutub.
