Adını hərb tarixinə qızıl hərflərlə yazan, iki dəfə Sovet İttifaqı Qəhrəmanı olan tank qoşunları general-mayoru Həzi Aslanovun Lənkəranda yerləşən ev-muzeyində Həcər Fərhad qızı Nəsirovanın qələmə aldığı “Həzi Aslanovun qəhrəmanlıqla dolu həyat yolu” kitabının təqdimatı keçirilib. Bu haqda məlumatı Cenublu.az bu gün, 13 sentyabrda Lənkəran Regional Mədəniyyət İdarəsinə istinadən verir.
Təqdimat mərasimində Lənkəran Regional Mədəniyyət İdarəsinin rəisi Şahin Şahbazov, Azərbaycan Yazıçılar Birliyinin Lənkəran zona bölməsinin sədri Qafar Cəfərli, Azərbaycan Vətən Müharibəsi Veteranları İctimai Birliyinin Lənkəran Rayon Şöbəsinin sədri İlham Qurbanov və müavini Saleh Dostiyev, qazilər, yazıçılar, media nümayəndələri, mədəniyyət işçiləri və digər qonaqlar iştirak ediblər.
Tədbirdə “Həzi Aslanovun qəhrəmanlıqla dolu həyat yolu” kitabının gənc nəslin vətənpərvər, milli ruhda böyüməsi və qəhrəmanlarımızın yaxından tanınmasında dəyərli vəsait olduğu qeyd olunub. Sonra çıxış edənlər nəşrin əhəmiyyətini yüksək qiymətləndirərək, Həzi Aslanovun döyüş yolundan söz açıblar.
Sonda “Həzi Aslanovun qəhrəmanlıqla dolu həyat yolu” kitabının müəllifi Həcər Nəsirova kitab haqqında geniş məruzə ilə çıxış edərək, əməyi keçən hər kəsə təşəkkürünü bildirib.
Tədbir bədii proqramla davam edib.
