Lənkəranda Havzova şəhidlərinin əziz xatirəsinə inşa edilən kompleksin açılış mərasimi baş tutub. Bu haqda bu gün, 20 avqust tarixində Cenublu.az Lənkəran ŞİH-yə istinadən xəbər verir.
Açılış mərasimində icra başçısı Taleh Qaraşov, rayonun idarə və müəssisələrinin rəhbər işçiləri və ictimaiyyətin nümayəndələri iştirak ediblər. Mərasim Vətən müharibəsi şəhidi Əbdülhəsən Həsənzadə Mirzə oğlunun doğum gününə və eləcə də Havzova şəhidlərinin xatirəsinə inşa edilən kompleksin açılışına həsr edilib.
Kompleksin açılış lentini Taleh Qaraşov şəhid anası Bağdagül Həsənova ilə birgə kəsib. Tədbirin davamında iştirakçılar şəhid Əbdülhəsən Həsənzadənin məzarını ziyarət ediblər, çiçəklər düzüblər, bütün şəhidlərin ruhlarına dualar ediblər.
Ə.Həsənzadə “Vətən uğrunda”, “İgidliyə görə”, “Qubadlının azad olunmasına görə”, “Füzulinin azad olunmasına görə” və “Şuşanın azad olunmasına görə” medalları ilə təltif edilib.
