Bu gün Lənkəran teatrının aktyorunun anım günüdür. Bu haqda məlumatı Cenublu.az bu gün, 5 yanvar tarixində verir.
Əməkdar artist Elşad Zeynalovun vəfatından 18 il keçir. Elşad Allahverdi oğlu Zeynalov 29 yanvar 1951-ci ildə Ağsuda anadan olub. 1969-1973-cü illərdə Mirzağa Əliyev adına Azərbaycan Dövlət İncəsənət İnstitutunun Dram və kino aktyorluğu fakültəsində təhsil alıb.
Universiteti bitirdikdən sonra təyinatla Lənkəran Dövlət Dram Teatrına aktyor kimi qəbul edilib. Burada 80-dən çox tamaşada müxtəlif səpkili rollar oynayıb.
28 oktyabr 2000-ci ildə Azərbaycan teatrının inkişafında göstərdiyi xidmətlərə görə Respublikanın Əməkdar artisti fəxri adına, həmçinin Prezident təqaüdünə layiq görülüb.
O, bir müddət Lənkəran Dövlət Dram Teatrının direktoru vəzifəsini də icra edib.
Elşad Zeynalov 5 yanvar 2006-cı ildə dünyasını dəyişib. Aktyor Lənkəranda dəfn olunub. 2010-cu ildə yaşadığı evə – Lənkəran şəhərinin Qala Xiyabanı, 28 ünvanında yerləşən binanın qarşısına xatirə lövhəsi vurulub.
