“Fərman Çay” məhsullarının istehsalı ilə məşğul olan şirkətə yeni sahiblər gəlir. Bu haqda bu gün, 5 sentyabr tarixində Cenublu.az Marja.az-a istinadən xəbər verir.
Lənkəran, Astara və Lerik plantasiyalarından yığılan məhsulla hazırlanan “Fərman Çay” kənd təsərrüfatı elmləri doktoru, prof. Fərman Quliyevin rəhbərliyi ilə "Azərbaycan Çay Assosiasiyası" mütəxəssislərinin nəzarəti altında yetişdirilir. "Lənkəran Çay-5" ASC iyul-avqust aylarında yığılmış çayları emal edir və qablaşdırır.
Şirkət bildirib ki, "Lənkəran Çay-5" ASC-nin təsisçilərinin dəyişməsi, 2021-ci ilin yekun hesabatları və digər məsələlərlə bağlı 8 oktyabr saat 09:30-da təsisçilərin yığıncağı keçiriləcək.
Qeyd edək ki, şirkətin nizamnamə kapitalı 829.482 manat təşkil edir. "Lənkəran Çay-5" ASC Lənkəranın Haftoni qəsəbəsində fəaliyyət göstərir.
