Daha öncə xəbər verdiyimiz kimi, Ə.Nəsirov adına Lənkəran rayonu Tütəpeştə kənd ümumi orta məktəbinə ünvanlanmış vətəndaş müraciətinə məktəbin gözətçisi tərəfindən cavab məktubu göndərilmişdir. Məsələ ilə bağlı bu gün, 31 avqust tarixində Lənkəran-Astara Regional Təhsil İdarəsi açıqlama verib.
Belə ki, açıqlamada bildirilir: “Azərbaycan Respublikasının Əmək Məcəlləsinin 131-ci maddəsinin 5-ci hissəsinin tələblərinə əsasən, təlim-tədris prosesində iştirak edən pedaqoji işçilərə əmək məzuniyyətləri bir qayda olaraq, məktəblərdə yay tətili dövründə verilir. Pedaqoji heyətə aid edilən məktəb rəhbərləri məzuniyyətdə olduğu müddət ərzində məktəbə rəhbərlik və nəzarət işi subordinasiya qaydalarına, həmçinin vəzifə üzrə məsuliyyət dərəcəsinə görə, məktəbin təsərrüfat işləri üzrə direktor müavininə, məktəbin təsərrüfat müdirinə və ya məktəbin gözətçisinə həvalə edilə bilər. Lənkəran rayonu Tütəpeştə kənd ümumi orta məktəbində təsərrüfat işləri üzrə direktor müavini və təsərrüfat müdiri vəzifələri nəzərdə tutulmadığı üçün vəzifə üzrə məsuliyyət dərəcəsinə uyğun olaraq, məktəbə rəhbərlik və nəzarət işi məktəbin gözətçisinə həvalə edilmişdir. Sosial şəbəkədə yerləşdirilmiş cavab məktubunun mətnindən aydın olur ki, gözətçi vətəndaşa öz səlahiyyətləri xaricində olan hər hansı mühüm məlumat verməmiş, məktəbin direktorunun hazırda məzuniyyətdə olması barədə ümumi məlumatı qeyd etmişdir”.
Qeyd edək ki, kənd məktəbinin direktoru Rövşən Əliyev carı ilin mart ayında bu vəzifəyə təyinat alıb.
