İran İslam Respublikasından qaçaqmalçılıq yolu ilə gətirilən narkotikləri Cəlilabad rayonu ərazisində gizlədən və Bakı şəhərində ayrı-ayrı şəxslərə satanlar saxlanılıblar. Bu haqda məlumatı Cenublu.az bu gün, 11 yanvar tarixində verir.
Daxili İşlər Nazirliyindən bildirilib ki, Baş Narkotiklərlə Mübarizə İdarəsi tərəfindən Bakının Sabunçu rayonunda keçirilən növbəti tədbir zamanı bu əməli törədən əvvəllər məhkum olunmuş paytaxt sakini Zaur Hacıyev və tanışı Bəhruz Cəbiyev saxlanılıblar.
Onların üzərində və B.Cəbiyevin idarə etdiyi avtomobildə 26 kiloqram heroin və 6 kiloqram psixotrop maddə metamfetamin olmaqla ümumilikdə 32 kiloqram narkotik aşkar edilib.
Faktla bağlı cinayət işi başlanıb, saxlanılan şəxslər barəsində həbs qətimkan tədbiri seçilib.
Əməliyyat-istintaq tədbirləri davam edir.
