Astara sərhəd postundan narkotik vasitələr keçirmək istəyən İran İslam Respublikasının vətəndaşı saxlanılıb. Bu haqda bu gün, 25 avqust tarixində Cenublu.az Dövlət Sərhəd Xidmətinə istinadən xəbər verir.
23 avqust saat 23:10-da “Astara” sərhəd nəzarət şöbəsinin və Cənub Ərazi Baş Gömrük İdarəsinin əməkdaşları tərəfindən narkotik keçirmə cəhdinin qarşısı alınıb. Belə ki, İİR vətəndaşı 41 yaşlı Babaei Kousalari Sadegh Samadin idarə etdiyi “Dong-Feng” markalı 38-D-43910 dövlət nömrə nişanlı yük avtomobili ilə narkotik vasitə keçirmək istəyib.
Avtomobilə keçirilən baxış zamanı salondan gizlədilmiş təxmini çəkisi 15 kq narkotik vasitəyə bənzər maddələr: 4085 qr “metamfetamin”, 7800 qr “heroin”, 2129 qr “tiryək”, 1050 qr “marixuana” və 920 qutu “KENT” markalı siqaretlər aşkar olunaraq götürülüb.
Faktla bağlı istintaq tədbirləri davam etdirilir.
