Ali Məhkəmədə Cəlilabad Rayon Mərkəzi Xəstəxanasının Doğum və ginekologiya şöbəsinin müdiri olmuş Nigar Qəhrəmanovanın barəsindəki hökmdən verilən kassasiya şikayəti üzrə məhkəmə iclası başa çatıb. Bu haqda məlumatı Cenublu.az bu gün, 10 yanvar tarixində Pravda.az-a istinadən verir.
Hakim Vidadi Cəfərovun sədrliyi ilə keçirilən prosesdə qərar elan olunub. Qərara əsasən, kassasiya şikayəti və kassasiya şikayətinə əlavə qismən təmin edilib, Şirvan Apellyasiya Məhkəməsinin çıxardığı qərar dəyişdirilib.
Belə ki, Nigar Qəhrəmanovanın 8 il 6 ay müddətinə azadlıqdan məhrumetmə cəzasını çəkməsi Cinayət Məcəlləsinin 79.1-ci maddəsinə əsasən, himayəsindəki 2017-ci il təvəllüdlü azyaşlı uşağın 14 yaşına çatmasınadək, yəni 2031-ci ilə kimi təxirə salınıb. Qadının üzərinə azyaşlı və digər uşaqlarına qayğı göstərmək və onların tərbiyəsi ilə məşğul olmaq vəzifələri qoyulub. Nigar Qəhrəmanovanın barəsində seçilmiş həbs qətimkan tədbiri ləğv edilib və o, cəzasını çəkdiyi cəzaçəkmə müəssisəsindən dərhal azad olunub. Şirvan Apellyasiya Məhkəməsinin qərarı qalan hissədə dəyişdirilmədən saxlanılıb.
Qeyd edək ki, Nigar Qəhrəmanova qeysəriyyə əməliyyatı ilə əkiz uşaqlar dünyaya gətirən 37 yaşlı Xəyalə Əhmədovanın və Cəlilabad rayonunun Muğan kənd sakini, 19 yaşlı Fatimə Həziyevanın ölümlərində günahkar bilinir. Ekspertiza hər iki ölümdə həkim səhvi olması haqda rəy verib. Həmçinin o, hər iki ananın ailə üzvlərindən rüşvət almaqda da ittiham olunub.
