Lənkərana yağan güclü qar rayonun sitrus bağlarına, əsasən də feyxoa ağaclarına ciddi ziyan vurub. Bu haqda məlumatı Cenublu.az bu gün, 26 yanvar tarixində Apa TV-yə istinadən verir.
Hektarlarla sitrus və subtropik meyvə bağlarında qollu-budaqlı feyxoa ağaclarının əksəriyyəti məhv olub. Fermerlər qarşıdan gələn mövsümdə az məhsul əldə edəcəklərini deyirlər. Onlar bildirirlər ki, məhsuldarlıq 10 dəfəyə kimi aşağı düşə bilər. Bu da həm də qiymət artımına səbəb ola bilər.
Fermerlər deyir ki, feyxoa ağacları kövrək olduğundan güclü qarın ağırlığına tab gətirməyib. Ağacların əvvəlki vəziyyətinə qayıtması üçün isə illərlə vaxt və zəhmət çəkmək lazım gələcək.
Mövcud vəziyyət kənd təsərrüfatı bitkilərinin sığortalanması məsələsini bir daha gündəmə gətirir. Təsərrüfat sahibləri xahiş edirlər ki, feyxoa bitkisi də digər sitrus meyvələri kimi, sığorta paketinə salınsın.
Məsələ ilə bağlı Aqrar Sığorta Fondundan bildirildi ki, müxtəlif məhsulların aqrar sığorta predmeti siyahısına daxil edilməsi ilə bağlı araşdırmalar aparılır. Bununla bağlı yaxın gələcəkdə qərarlar qəbul olunacaq. Feyxoa bağlarının ölkədə həcmi və iqtisadi rolu artdıqca onlar da gələcəkdə sığorta məhsulları siyahısına daxil ediləcək.
Qeyd edək ki, hazırda Astara və Lənkəranda ümumilikdə 1340 ha feyxoa bağları var.
