İrandan Azərbaycan ərazisinə qanunsuz daxil olan Əfqanıstan vətəndaşları həbs edilib.
Lent.аz xəbər verir ki, Əfqanıstan İslam Respublikasının iki vətəndaşı Astara rayonu ərazisində dövlət sərhədini pozduqlarına görə saxlanılıblar.
İttihama görə, 28 yaşlı əfqan gənclər işləmək məqsədilə əvvəlcə İranın paytaxtı Tehrana gediblər. Bir müddət orada çalışdıqdan sonra Türkiyəyə keçmək qərarına gəliblər. Bu zaman onlara kömək edən yerli şəxs Türkiyəyə deyil, Azərbaycana keçməyin "yolunu bildiyini" deyərək hər birindən 500 dollar alıb.
Onun göstərişi ilə gənclər İran–Azərbaycan sərhədinə gəlib və gecə saatlarında mobil telefonlarındakı "Google Maps" proqramından istifadə edərək Astara rayonu istiqamətində sərhədi keçiblər. Lakin qısa müddət sonra Azərbaycan sərhədçiləri tərəfindən saxlanılıblar.
Məhkəmədə hər iki əcnəbi əməllərindən peşman olduqlarını bildirərək yüngül cəza verilməsini xahiş edib. Onlardan biri isə Əfqanıstanda təqib olunduğunu və geri qayıdacağı təqdirdə öldürülə biləcəyini deyib.
Məhkəmənin qərarı ilə hər iki şəxs 2 il müddətinə azadlıqdan məhrum edilib.
