Sütəmurdov körpüsündə intihara cəhd göstərən şəxslə bağlı səsləndirilən iddialar həqiqəti əks etdirmir. Bu haqda bu gün, 18 avqust tarixində Daxili İşlər Nazirliyi Cenublu.az-a açıqlama verib.
DİN-dən verilən məlumata əsasən, əvvəllər məhkum olunmuş C.Əlizadənin intihar etmək istəməsinə səbəb kimi göstərilən nəqliyyat vasitəsinin həmin şəxsə heç bir aidiyyəti yoxdur. “Lada Priora” markalı avtomobil onun tanışına məxsusdur və həmin şəxs qayda pozuntusuna yol verdiyi üçün DYP əməkdaşları tərəfindən saxlanılaraq protokol tərtib edilib.
İntihar etmək istədiyini deyən C.Əlizadə FHN və polis əməkdaşlarının birgə səyi nəticəsində körpüdən düşürüldükdən sonra Lənkəran Mərkəzi Rayon Xəstəxanasına gətirilib və müayinə zamanı onun psixotrop maddə qəbul etdiyi müəyyən edilib. C.Əlizadənin intihar etmək istəməsi ilə bağlı materiallar toplanılaraq Lənkəran rayon prokurorluğuna göndərilib.
Həmçinin qeyd olunur ki, təxminən 1 ay əvvəl də başqa bir məsələ ilə bağlı intihar etmək istəməsi ilə bağlı DİN-in “102” xidməti zəng mərkəzinə müraciət edib. Həmin müraciət əsasında da rayon prokurorluğunda araşdırma aparılır.
