Azərbaycan mətbəxi zəngin və özünəməxsus yeməkləri ilə seçilir. Zaman keçdikcə bəzi qədim təamlar gündəlik süfrələrdən uzaq düşsə də, onların ləzzəti bu gün də unudulmur. Belə yeməklərdən biri də əsasən Lənkəran mətbəxinə məxsus olan murqutuşdur. Toyuq əti, qoz və göyərtidən hazırlanan bu yemək həm qidalı, həm də fərqli dadı ilə seçilir.
Belə ki, murqutuşun hazırlanma qaydasını təqdim edilir:
Lazım olan ərzaqlar:
* 1 ədəd kənd çolpası
* 1 ədəd soğan
* 2 dəstə cəfəri
* 100 qram qoz ləpəsi
* 150 qram kərə yağı
* 1,5 stəkan toyuq bulyonu
* Abqora və ya yarım limonun suyu
* Duz
* Qara istiot
* İstəyə görə yarım stəkan nar dənəsi
Hazırlanma qaydası
Əvvəlcə toyuğu tikələrə bölüb suda bişirin. Bişdikdən sonra bulyonunu saxlayın.
Soğanı xırda doğrayın və kərə yağında qızılı rəng alanadək qovurun. Ardınca xırda doğranmış cəfərini əlavə edib bir neçə dəqiqə birlikdə bişirin.
Qovrulmuş qarışığın üzərinə toyuq tikələrini, duz və qara istiotu əlavə edin. Təxminən 4-5 dəqiqə bişirdikdən sonra xırdalanmış qoz ləpəsini, abqoranı və ya limon suyunu, həmçinin 1,5 stəkan toyuq bulyonunu əlavə edib zəif odda 15 dəqiqə bişirin.
Hazır murqutuşu plovun yanında süfrəyə verə bilərsiniz. İstəyə görə üzərini nar dənələri ilə bəzəmək də mümkündür.
Mənbə: demokrat.az
