Cəlilabad rayonunun Uzuntəpə kəndi ərazisində kanalizasiya tullantılarının axıdıldığı kollektorun suyundan əkin sahələrinin suvarılmasında istifadə olunur.
Cenublu.az xəbər verir ki, kollektor boyunca yerləşən sahələrdə kartof, çiyələk və digər kənd təsərrüfatı məhsulları yetişdirilir. Təsərrüfat sahibləri kollektor suyunu nasoslar və plastik borular vasitəsilə əkin sahələrinə ötürürlər. Əkinçilər bu sudan bir neçə ildir istifadə etdiklərini və suyun laboratoriyada yoxlanıldığını bildirirlər.
Lakin Azərbaycan Qida Təhlükəsizliyi Agentliyindən bildirilib ki, sözügedən su mənbəyindən nümunə götürülməyib. Agentlik həmçinin qeyd edib ki, suyun kənd təsərrüfatında suvarma üçün yararlılığı ilə bağlı rəy vermək AQTA-nın səlahiyyətlərinə aid deyil.
Cəlilabad Su Meliorasiya Sistemləri İstismarı İdarəsindən isə bildirilib ki, təmizləyici qurğudan çıxan sular laboratoriyada yoxlanılaraq müəyyən edilmiş standartlara uyğun kollektora axıdılır. Bununla yanaşı, idarə əməkdaşlarının bəzi fərdi evlərin sanitar qovşaqlarından çəkilən tullantıların da kollektora axıdıldığını müşahidə etdiyi qeyd olunub.
Mütəxəssislər xəbərdarlıq edirlər ki, kanalizasiya sularında insan sağlamlığı üçün təhlükə yarada biləcək bakteriya, virus, parazit, kimyəvi maddə və ağır metallar ola bilər. Belə sudan xüsusilə çiy halda istehlak edilən məhsulların yetişdirilməsində istifadə edilməsi sağlamlıq baxımından risk yarada bilər.
