Güclü qar yağması səbəbindən Cəlilabad–Yardımlı avtomobil yolunda hərəkət çətinləşib, dağlıq ərazilərdə isə yol tamamilə bağlanıb.
Cenublu.az-ın məlumatına görə, yolun bəzi hissələrində qarın hündürlüyü və buzlaşma nəqliyyat vasitələrinin yolda qalmasına səbəb olub. Hazırda bir sıra istiqamətlərdə yalnız xüsusi texnika, eləcə də "Niva" və "UAZ" tipli avtomobillərin hərəkəti mümkündür.
Qar yağması Cəlilabadın elektrik təsərrüfatına da ciddi ziyan vurub. Kəndlərarası və kənddaxili elektrik xətlərinin qırılması nəticəsində bir sıra yaşayış məntəqələrində elektrik enerjisinin verilişi dayanıb. Hazırda rayon üzrə 50-dən çox kənd işıqsız qalıb.
Rayon Fövqəladə Hallar Komissiyasından verilən məlumata görə, yaranmış fəsadların aradan qaldırılması istiqamətində ərazi üzrə bərpa işləri davam etdirilir.
