FHN tərəfindən Vətən müharibəsi ilə bağlı psixoloji problemlər yaşayan müharibə iştirakçılarının reabilitasiyasının daha səmərəli təşkili məqsədilə psixoloji yardım işləri görülür. Bu haqda bu gün, 5 sentyabr tarixində Cenublu.az FHN-yə istinadən xəbər verir.
Nazirliyin dəvəti ilə Türkiyə Respublikasından gələn peşəkar psixoterapevtlər və FHN-in psixoloqları qazilərə, o cümlədən doğmalarını itirmiş şəhid ailəsi üzvlərinə, erməni terrorundan fiziki və mənəvi zərər görmüş insanlara psixoloji yardım göstərəcəklər.
Cənub zonasında görüşlər FHN-in Cənub Regional Mərkəzində (Lənkəran rayonu, Digah kəndi) keçirilir.
Qeyd edək ki, Türkiyədən Azərbaycana 20 nəfərdən artıq peşəkar psixoloq təşrif buyurub. Ödənişsiz keçirilən görüşlərdə iştirak etmək istəyən Vətən müharibəsi ilə əlaqədar psixoloji problemlər yaşayan vətəndaşlar Nazirliyin “112” qaynar telefon xətti vasitəsilə qeydiyyata yazıla bilərlər.
