Lənkəran, Cəlilabad və Masallı rayonlarında quş qripi xəstəliyindən qorunmaq məqsədilə monitorinqlər həyata keçiriləcək. Bu haqda məlumatı Cenublu.az bu gün, 9 fevral tarixində verir.
Azərbaycan Respublikasının Qida Təhlükəsizliyi Agentliyi tərəfindən təşkil olunacaq yoxlamalar 12-16 fevral tarixlərində keçiriləcək. Epizootoloji monitorinq zamanı Lənkəran rayonundakı Qızılağac Milli Parkında vəhşi quşlara ümumi baxış keçiriləcək, xəstəlik törədicisinin aşkar edilməsi məqsədilə vəhşi quşlar ovlanacaq. Həmçinin həmin müddətdə Lənkəran, Cəlilabad, Masallı rayonlarında quşçuluq müəssisələrində, o cümlədən Lənkəran, Masallı rayonlarının ailə təsərrüfatlarında ev quşlarından diaqnostik nümunələr götürüləcək.
Eyni zamanda ölkə üzrə müəssisələrə, təsərrüfatlara, su hövzələrinə və parklara ümumi baxış keçirilməklə baytarlıq norma və qaydalarına əməl olunması üçün məqsədyönlü maarifləndirmə-təbliğat tədbirləri həyata keçiriləcək.
Bundan əlavə, xırdabuynuzlu heyvanların quduzluq və vəba xəstəliklərinə dair müşahidələrin aparılması, xəstə və ya ölmüş heyvanlar aşkar edildikdə diaqnostik nümunələrin götürülməsi planlaşdırılır.
Yoxlamalarda Qida Təhlükəsizliyi Agentliyinin, Qida Təhlükəsizliyi İnstitutunun, Kənd Təsərrüfatı Nazirliyi yanında Aqrar Xidmətlər Agentliyinin Heyvan Sağlamlığı və Baytarlıq Xidmətləri Mərkəzinin və yerli Heyvan Sağlamlığı və Baytarlıq Xidmətləri İdarələrinin, Ekologiya və Təbii Sərvətlər Nazirliyi yanında Bioloji Müxtəlifliyin Qorunması Xidmətinin və Səhiyyə Nazirliyinin Xüsusi Təhlükəli İnfeksiyalara Nəzarət Mərkəzinin əməkdaşları və mütəxəssisləri iştirak edəcəklər.
