Sabirabad rayonunun Xəlfəli kəndində canavarların fərdi təsərrüfatlara hücumu qeydə alınıb.
Cenublu.az xəbər verir ki, hadisə kənd sakini Mənsur Seydiyevə məxsus təsərrüfatda baş verib. Onun sözlərinə görə, gecə saatlarında tövləyə daxil olan canavarlar 15-ə yaxın xırdabuynuzlu heyvana hücum edib.
Nəticədə 5 qoyun tələf olub, digər heyvanlar isə müxtəlif dərəcəli xəsarətlər alıb. Tələf olmuş heyvanlar sahibi tərəfindən basdırılıb, yaralı qoyunlara isə müvafiq profilaktik tədbirlər görülüb.
Mənsur Seydiyev bildirib ki, bu, son bir həftə ərzində canavarların onun təsərrüfatına ikinci hücumudur. Onun sözlərinə görə, yırtıcıların hücumları yalnız onun təsərrüfatı ilə məhdudlaşmır, kənddəki digər sakinlər də oxşar problemlərlə üzləşirlər.
