Cəlilabadda yanğın təhlükəsizliyi ilə bağlı görülmüş işlər və qarşıda duran vəzifələr barədə müşavirə keçirilib. Bu haqda məlumatı Cenublu.az bu gün, 31 may tarixində verir.
Müşavirədə rayon icra hakimiyyəti, bir sıra qurum və təşkilatların məsul şəxsləri, bələdiyyə sədrləri, məktəb direktorları, müəssisələr və kombinat direktorları, mexanizatorlar və fermerlər iştirak ediblər.
Tədbirdə çıxış edənlər xüsusilə tikililərarası yanğına qarşı ara məsafələrinə riayət olunmaması, elektrik kabel və naqillərinin çəkilişi qaydalarının pozulması, tövlələrin çardaq hissəsində otun açıq və ya kipləşdirilmiş şəkildə yığılması, həyətyanı sahələrdə məişət və sair tullantı materiallarının nəzarətsiz yandırılması mövzularına toxunublar.
Müşavirənin sonunda taxıl və ot yığımı ərəfəsində bütün kənd təsərrüfatı texnikalarının yanğına qarşı hazırlanması, ilkin yağınsöndürmə vasitələri ilə təmin edilməsi və məhsul yığımında iştirak edən texnikanın hamısı biçinə başlamazdan əvvəl yanğına qarşı texniki müayinədən keçirilməsi, onların yanğın təhlükəsizliyi tələblərinə cavab vermələri barədə akt tərtib edildikdən sonra sahəyə buraxılması, bir daha məktəblərdə, əhali arasında maarifləndirici tədbirlərin keçirilməsi barədə aidiyyəti şəxslərə tapşırıqlar verilib.
Mövzu ilə bağlı interaktiv müzakirələr aparılıb, suallar cavablandırılıb.
