Lənkəran Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Səftər Babayevə (soyadı şərti) hökm oxunub. Bu haqda məlumatı Cenublu.az bu gün, 30 may tarixində Avtosfer.az-a istinadən verir.
Hakim Neymət Məmmədovun sədrliyi ilə keçirilən prosesdə S. Babayev 3 il müddətinə azadlıqdan məhrum edilib.
İttihama görə, hadisə ötən il mayın 24-də Cəlilabad rayonunun Edişə kəndində qeydə alınıb.
Səftər Babayev qardaşı, zərərçəkmiş Şaiq Babayevlə yaşadığı fərdi yaşayış evinin həyətyanı sahəsində mübahisə edib. Mübahisəyə səbəb isə təqsirləndirilənin qardaşına məxsus biçilmiş otu icazəsiz olaraq yığıb aparması olub. Buna görə Şaiq Səftərə irad tutub. Sonra Səftər yaba ilə qəsdən zərərçəkmiş şəxsin baş və sol bud nahiyəsinə zərbələr vuraraq ona qapalı kəllə-beyin travması, baş beyin silkələnməsi, sağ alın-gicgah nahiyəsində əzilmiş yara ilə nəticələnən bədən xəsarətləri yetirib.
