Cəlilabad şəhərinin Mehdi Hüseyn küçəsində yerləşən 9 saylı tam orta məktəbin qarşısında nə yol nişanları, nə də piyadalar üçün keçid zolağı var.
Teleqraf.аz xəbər verir ki, beş ildir istifadədə olan məktəbdə mindən çox şagird təhsil alır.
Valideynlərin sözlərinə görə, hər gün yüzlərlə uşaq məktəbə gəlmək və çıxmaq üçün bu yoldan istifadə edir. Ancaq burada nə işıqfor, nə piyada zolağı, nə də sürət tənzimləyici tramplin mövcuddur. Avtomobillərin yüksək sürətlə hərəkəti isə həm şagirdlər, həm də digər piyadalar üçün təhlükə yaradır.
Məktəbin təsərrüfat işləri üzrə direktor müavini Hafiz Şükürov bildirib ki, məsələ ilə bağlı aidiyyəti qurumlara dəfələrlə müraciət olunub: “Məktəbimizdə 1000-dən çox şagird oxuyur, 50-dən çox müəllim çalışır. Hər gün hamı bu yoldan keçir. Yol asfalt olsa da, heç bir nişan və ya hərəkət məhdudlaşdırıcı vasitə yoxdur”.
Valideynlər də oxşar narahatlıq ifadə ediblər. Onların sözlərinə görə, bu ərazidə bir neçə dəfə təhlükəli vəziyyətlər yaranıb, uşaqların həyatı risk altına düşüb.
Məsələyə münasibət bildirən Azərbaycan Yerüstü Nəqliyyat Agentliyi isə açıqlamasında qeyd edib ki, ölkə ərazisində yol nişanlarının quraşdırılması və nişanlama xətlərinin çəkilməsi mərhələli şəkildə həyata keçirilir:
“Sözügedən ərazi ilə bağlı rəsmi müraciət daxil olduqdan sonra Agentliyin müvafiq struktur bölmələri yerində baxış keçirəcək və normativ tələblərə uyğun olaraq işlər icra ediləcək”.
Qurumdan əlavə olaraq bildirilib ki, işıqfor və radar qurğularının quraşdırılması məsələsi Baş Dövlət Yol Polisi İdarəsinin səlahiyyətindədir və bunun üçün ayrıca müraciət edilməlidir.
