Cəlilabad Dövlət Peşə Təhsil Mərkəzinə “Kənd təsərrüfatında yaşıl innovasiyalar” adlı infotur təşkil olunub. Bu haqda məlumatı Cenublu.az bu gün, 25 may tarixində Azərtac-a istinadən verir.
“Yaşıl dünya naminə həmrəylik ili” çərçivəsində keçirilən tədbir Elm və Təhsil Nazirliyi və Peşə Təhsili üzrə Dövlət Agentliyinin birgə təşkilatçılığı ilə baş tutub.
Buraya agentliyin nümayəndələri, Lənkəran və Cəlilabadda yerləşən peşə təhsil müəssisələrinin rəhbərləri və işçiləri, həmçinin kənd təsərrüfatı sahəsində fəaliyyət göstərən şirkətlərin rəhbərləri və sahə ekspertləri cəlb olunublar. Onlara mərkəzdə yaradılmış şərait haqqında məlumat verilib. Həmçinin “Kənd təsərrüfatında innovativ metodların tətbiqi”, “Qənaətli suvarma sistemləri” mövzusunda təqdimatlar edilib.
Qeyd edək ki, müasir infrastruktur, maddi-texniki baza ilə təchiz olunan mərkəzin ərazisində 25 sinif otağı, 3 laboratoriya, 13 emalatxana, informatika kabineti, STEAM Mərkəzi, praktiki məşğələ otağı, kitabxana, 252 yerlik akt zalı, 128 yerlik yeməkxana, idman zalları və meydançaları, avtotəmir binası, maldarlıq ferması və digər köməkçi binalar yerləşir. Müəssisədə kənd təsərrüfatı məhsullarının istehsalı üzrə fermer, bitkiçilik, heyvandarlıq və baytarlıq üzrə mütəxəssislər də hazırlanırlar.
