Güclü qar Cəlilabad şəhərinin bir hissəsini və rayonun 90 kəndini işıqsız qoyub. Bu haqda məlumatı Cenublu.az bu gün, 25 yanvar tarixində verir.
Cəlilabad rayon İcra Hakimiyyətindən bildirilib ki, yağan güclü qarın fəsadları və elektrik enerjisinin verilişində yaranmış fasilələrlə bağlı problemlər həll edilir:
“Yanvarın 23-dən Cəlilabad rayonuna aramsız yağan güclü qar nəticəsində elektrik təsərrüfatına ciddi ziyan dəyib. Belə ki, yanvarın 24-ü gecə saatlarında 10 kV-lıq elektrik hava xətlərinin 15 ədəd işıq dirəyi aşıb, 150 yerdən xətt qırılmaları olub, 3000 metr naqil sıradan çıxıb. Eyni zamanda 0,4 kV-lıq paylayıcı elektrik hava xətlərində 50 ədəd işıq dirəyi aşıb, 700 yerdən xətt qırılmaları olub, 5000 metr naqil sıradan çıxıb. Həmçinin 50 ədəd transformatorda qoruyucular yanıb. Nəticədə Cəlilabad şəhərinin müəyyən hissələrinə və rayonun 90 kəndinə elektrik enerjisinin verilişi dayanıb. Qəzaların, əsasən, meşəlik ərazilərdə, hərəkətin mümkünsüz olduğu əkin və relyefcə çətin yerlərdə baş verməsi yaranmış vəziyyətə müdaxilə olunmasına çətinliklər yaradıb.
Görülmüş operativ tədbirlər nəticəsində “Azərişıq” ASC tərəfindən rayona 5000 metr 10 kV-lıq elektrik xətləri üçün naqil, 45 ədəd elektrik dirəyi, 5000 metr 0,4 kV-lıq paylayıcı üçün SİP naqil, 100 ədəd dirək göndərilib. “Azərişıq” ASC-dən və regionlardan işlərin yerinə yetirilməsi üçün 7 ədəd kran, 10 ədəd yolsuzluq maşını, 5 ədəd xüsusi avadanlıqlarla təchiz olunmuş avtomobil, 50 nəfərdən ibarət qəza briqadası rayona ezam olunub.
Operativ və təxirəsalınmaz tədbirlər nəticəsində yanvarın 25-də Cəlilabad şəhəri də daxil olmaqla 65 kəndə elektrik enerjisinin verilişi təmin olunub. 25 kəndə isə elektrik enerjisinin verilməsi, 10 və 0,4 kV-lıq hava xətlərində yaranmış qəzaların tam aradan qaldırılması üçün “Azərişıq” ASC-nin Cəlilabad Elektrik şəbəkəsi tərəfindən işlər davam etdirilir”.
[caption id="attachment_52616" align="alignnone" width="336"]
Foto Cəlilabad Rayon İcra Hakimiyyəti[/caption]
