Bu gün, 12 mart tarixində şəhid Təbriz İsabala oğlu İsayevin mövlud günüdür.
Azərbaycan Ordusunun Xüsusi Təyinatlı Qüvvələrinin kiçik giziri olan Təbriz İsayev 1993-cü ildə Cəlilabad rayonunun Bəcirəvan kəndində anadan olub.
O, 2014-cü ildən etibarən Xüsusi Təyinatlı Qüvvələrin tərkibində gizir kimi xidmət etməyə başlayıb. 2016-cı il Aprel döyüşləri zamanı yaralanıb və müalicə aldıqdan sonra xidmətinə davam edib. 2020-ci ildə Vətən müharibəsində savaşıb. Təbriz bu döyüşlərdə yaralanaraq xəstəxanaya yerləşdirilib, lakin həkimlərə döyüşə qatılmaq istədiyini bildirib və öz ərizəsi ilə təkrar döyüşlərə qatılıb. 10 oktyabr tarixində Xocavənd istiqamətində, Hadrutun azadlığı uğrunda gedən döyüşlərdə qəhrəmancasına şəhid olub.
Ölümündən sonra "Vətən uğrunda", "İgidliyə görə", "Cəbrayılın azad olunmasına görə", "Kəlbəcərin azad olunmasına görə", "Xocavəndin azad olunmasına görə" medalları və "Azərbaycan Bayrağı" ordeni ilə təltif edilib.
