Bu gün, 12 iyul tarixində əslən Masallıdan olan Azərbaycan Silahlı Qüvvələrinin kiçik giziri, Aprel döyüşləri şəhidi Seymur Qulamhüseyn oğlu Baxışovun mövlud günüdür.
Seymur Baxışov 1987-ci ilin bu günündə Sumqayıt şəhərində Qulamhüseyn və Zemfira Baxışovların ailəsində anadan olub. 1994-2005-ci illərdə Sumqayıt şəhərində yerləşən 14 saylı tam orta məktəbdə təhsil alan Seymur Baxışov 2009-cu ildə Aynur adlı xanımla ailə qurub, Amin adında bir oğlu var.
Kiçik gizir Seymur Baxışov 2016-cı ilin aprel ayında Azərbaycan-Ermənistan təmas xəttində baş verən atışma zamanı şəhid olub.
19 aprelin 2016-cı ildə meyiti təmas xəttindən götürülüb, 20-si isə Sumqayıt Şəhidlər xiyabanında dəfn olunub.
Seymur Baxışov göstərdiyi qəhrəmanlığa görə ölümündən sonra "Hərbi xidmətdə fərqlənməyə görə" III dərəcəli medalı ilə təltif olunub.
2017-ci ildə şəhid Seymur Baxışovun yaşadığı binanın qarşısında xatirə lövhəsinin açılışı olub.
